ئەمڕۆ شەممە 5/2، مەسرور بارزانی، سەرۆکی حکومەتی هەرێمی کوردستان، پێشوازی لە عەلی ئەلزەیدی، سەرۆک وەزیرانی ڕاسپێردراوی حکومەتی فیدراڵ و شاندێکی چوارچێوەی هاوئاهەنگی کرد.
لە کۆبوونەوەکەدا هەوڵ و گفتوگۆکانی پێکهێنانی کابینەی نوێی حکومەتی فیدراڵ تاوتوێ کرا.
سەرۆکی حکومەت دووپاتی کردەوە کە ئێمە پشتیوانیی پێکهێنانی حکومەتی نوێ دەبین لەپێناو چارەسەرکردنی کێشە هەڵپەسێردراوەکانی نێوان هەرێمی کوردستان و حکومەتی فیدراڵ، لەسەر بنەمای دەستوور و ڕێزگرتن لە مافەکانی خەڵکی کوردستان و قەوارەی فیدراڵیی هەرێمی کوردستان.
سەرۆکی حکومەت جەختیشی کردەوە کە ئێستا دەرفەتێکی نوێ هاتووەتە ئاراوە کە کێشەکان بەشێوەیەکی بنەڕەتی و یەکجارەکی چارەسەر بکرێن و بەشێوەیەکی دادپەروەرانە ڕەفتار لەگەڵ هەرێمی کوردستان بکرێت و بەڕێوەبردنی پرۆسەی سیاسیی عێراقیش لەسەر بنەمای هاوبەشی، هاوسەنگی و سازان بێت.
سەرۆک وەزیرانی ڕاسپێردراوی فیدراڵ، سوپاسی پێشوازی و پشتیوانیی سەرۆکی حکومەتی کرد و جەختی کردەوە کە بەهێزبوونی هەرێمی کوردستان، بەهێزبوونی حکومەتی فیدراڵییە و دڵنیایی دەدەین کە بەشێوەیەکی دادپەروەرانە، مامەڵە لەگەڵ هەرێمی کوردستان دەکەین.